Friday, November 15, 2019
Home > ዜና > የዩኒቨርሲቲ መግቢያ ጊዜ ላልተወሰነ ጊዜ ተራዘመ!

የዩኒቨርሲቲ መግቢያ ጊዜ ላልተወሰነ ጊዜ ተራዘመ!

የዩኒቨርሲቲ መግቢያ ጊዜ ላልተወሰነ ጊዜ ተራዘመ

******************************************

ኤል ቲቪ- የ2011 ዓ.ም የትምህርት ዘመን የዩኒቨርሲቲ ተማሪዎች የመግቢያ ጊዜ በትምህርት ፍኖተ-ካርታ ውይይት ምክንያት መራዘሙን የትምህርት ሚኒስቴር አስታወቀ።

የሚኒስቴሩ የኮሙኒኬሽን ዳይሬክተር ወይዘሮ ሀረግ ማሞ ለኢትዮጵያ ዜና አገልግሎት እንደገለጹት፤ በአዲሱ የትምህርት ፍኖተ-ካርታ በሚደረገው ውይይት ምክንያት የ2011 ዓ.ም የዩኒቨርሲቲ መግቢያ ጊዜ ላልተወሰነ ጊዜ ተራዝሟል።

መንግሥት በቅርቡ በአዲስ ባዘጋጀው ረቂቅ የትምህርት ፍኖተ-ካርታ ላይ ተጨማሪ ግብዓት ማሰባሰቢያ ውይይት ስለሚደረግ ቀደም ብሎ ለዩኒቨርሲቲ ተማሪዎች ተላልፎ የነበረው ጥሪ መራዘሙን ነው ዳይሬክተሯ የገለፁት።

ዩኒቨርሲቲዎች ከመምህራኖቻቸው እና ከአስተዳደር ሠራተኞቻቸው ጋር በረቂቅ ፍኖተ-ካርታው ላይ ውይይት አድርገው ሲያበቁ ከጥቅምት ወር መጀመሪያ አንስቶ እንደ የዩኒቨርሲቲዎቹ መርሀ-ግብር ጥሪ ይደረጋል ተብሎ የቆየ ቢሆንም ውይይቱ አሁን ድረስ እየተካሄደ በመሆኑ ምክንያት የመግቢያ ጊዜው ላልተወሰነ ጊዜ ተራዝሟል።

ላለፉት ሁለት ወራት ግብዓት ለማሰባሰብ ውይይት ሲደረግበት የቆየው የትምህርት ፍኖተ-ካርታ ረቂቅ ጥናት ከአንደኛና ሁለተኛ ደረጃ ትምህርት ቤት ማኅበረሰብ አባላት ጋርም በዛሬው ዕለት በመላ አገሪቱ ውይይት እየተደረገበት ይገኛል።

በመሆኑም ውይይቱ ሲጠናቀቅ በማዕከል በኩል ለሁሉም የዩኒቨርሲቲ ተማሪዎች ጥሪ እንደሚደረግ ተናግረዋል።

በአገር አቀፍ ደረጃ የተዘጋጀው የትምህርትና ስልጠና ፍኖተ-ካርታ የትምህርት ጥራትን ለማስጠበቅ ያለመ መሆኑ ይታወቃል።

Leave a Reply

This site uses Akismet to reduce spam. Learn how your comment data is processed.