Tuesday, July 23, 2019
Home > ዜና > መሸነፍ ለዘለዓለሙ ይኑር

መሸነፍ ለዘለዓለሙ ይኑር

ዴሞክራሲ የሚበለጽገው በመሸነፍ ላይ እንጂ በማሸነፍ ላይ አይደለም፡፡ ማሸነፍ መሸነፍ ከሌለ ትርፉ ጦርነት ነው፡፡ የሀገራችን ዴሞክራሲያዊ ባሕል አለመበልጸጉን ከሚያሳዩን አንዱ መሸነፍን የምንገልጽበት መንገድ ነው፡፡ መደምሰስ፣ ማንጠፍ፣ መዘረር፣ ማንኮታኮት አሁንም የፖለቲካ ቃሎቻችን ናቸው፡፡

መሸነፍን የሚያበረታታና ተሸናፊን የሚያጀግን ባሕል ከሌለን ምርጫዎቻችን ሁሉ ጦርነት እንዲሆኑ መፍቀዳችን ነው፡፡ በአዋሳው የኢሕአዴግ ጉባኤ የታየው የሊቃነ መናብርት ምርጫ ሀገራችን ከምትፈልገው የምርጫ ሂደት ትንሹ ነው፡፡ በአንድ ፓርቲ ሰዎች መካከል የተደረገ የውስጥ ምርጫ፡፡ ዶ/ር ደብረ ጽዮን የተወዳደረው ለምርጫው ተነሥቶ፣ የምረጡኝ ዘመቻ አድርጎ አይደለም፡፡ ተጠቆመ፣ ተወዳደረ፣ ያገኘውን አገኘ፡፡ ይህ ሁሉ የድርጅቱ ባሕል ነው፡፡

ለመሆኑ ቢያሸንፍ ኖሮ ምን እንል ነበር? ማሸነፍም መሸነፍም እንዴት እኩል ያስወቅሳል? ይህንን የሚያዩ ሰዎች ማሸነፍ ወይም ሞት ቢሉ ምን ይገርማል? ማበረታታት የሚገባን አሸናፊዎችን አይደለም፤ ተሸናፊዎችን ነው፡፡ ኢትዮጵያኮ የአሸናፊዎች እጥረት የለባትም፡፡ የተሸናፊዎች እንጂ፡፡

አገር ሰላም እንድትሆን፣ ዴሞክራሲም እንዲዳብር፣ መሸነፍ ለዘለዓለሙ ይኑር፡፡ ተሸናፊዎች ከአሸናፊዎች በላይ ጀግኖች ናቸው፡፡

Leave a Reply

This site uses Akismet to reduce spam. Learn how your comment data is processed.