Sunday, September 22, 2019
Home > ዜና > የዳዎድ ኢብሳ መንግሥት

የዳዎድ ኢብሳ መንግሥት

በአቻሜለህ ታምሩ – ከዚህ በፊት ኢትዮጵያ ውስጥ «ሁለት መንግሥት ነው ያለው» ሲባል ሰምተናል። አገር እንጂ የፖለቲካ ፓርቲ ወታደር ሊኖረው ስለማይችል ትጥቅ እንደማይፈታ እየነገረን ያለው ዳዎድ ኢብሳ ሶስተኛ መንግሥት ለመሆን እየፈለገ ይመስላል። በአንድ አገር ውስጥ ሁለትም ሆነ ሶስት መንግሥት ስለማይኖር ዳወድ ኢብሳ አዲስ አበባ ውስጥ ተቀምጦ «ማነው ማንን ትጥቅ የሚያስፈታው!» ሲል በአገዛዙ ልሳን በዋልታ የተናገረው ድፍረት የተሞላበት ንግግር ኢትዮጵያ ውስጥ መንግሥት ላለመኖሩ ማሳያ ነው።

ዳዎድን ወደ ኋላ መለስ ብለን ካየነው ልቡ እያበጠ፤ ፍላጎቱ እያየለ የመጣ ሰው ነው። ባለፈው ዓመት አትላንታ የተካሄደው «የኦሮሞ ትግል መሪዎች ኮንቬንሽን» ለዳውድ ኢብሳ በወያኔ ቋንቋ አንድ «ኮማንድ ፖስት» ሰጥቶት ነበር። ለዳወድ ኢብሳ የተሰጠው «ኮማንድ ፖስት» «የምዕራብና የምስራቅ ኮማንድ ፖስት» ይባል ነበር። «የደቡብ ኮማንድ ፖስት» በሚል የተሰየመና ቦረናን፣ ባሌንና አርሲን የሚያጠቃልል ሌላ ኮማንድ ፖስትም ነበር። የዚህ ኮማንድ ፖስት አዛዥ ደግሞ የኦነግ መሪ እንዲሆን በጉባኤ ከተመረጠ በኋላ ዳዎድ ኢብሳ መፈንቅለ መሪ አካሂዶ በማባረር ስልጣኑን የቀማው በደርግ ዘመን ሻዕብያ ማርኮት ለወያኔ በምርኮ ከተሰጡና ኦሕዴድን እንዲመሰርቱ ከተደረጉት ምርኮኞች አንዱ የሆነው ከማል ገልቹ ነበር። በአትላንታው «የኦሮሞ ትግል መሪዎች ኮንቬንሽን» የተመደቡት ኮማንድ ፖስቶች ጠቅላይ አዛዥ ደግሞ በቀለ ገርባ ነበር።

የአትላንታው «የኦሮሞ ትግል መሪዎች ኮንቬንሽን» እንደተጠናቀቀ አስመራ የነበረው ዳዎድ ኢብሳ የተሰጠኝ «የምዕራብና የምስራቅ ኮማንድ ፖስት» መሪነት አነሰብኝ በማለት በጉባኤው ማግሥት የአትላንታ የተሰባሰቡትን «የኦሮሞ ትግል መሪዎች» ፈግጦ «በኢትዮጵያ የተቀጣጠለውን የኦሮሞ ሕዝብ አመጽ የምመራው እኔ ነኝ» የሚል መግለጫ አወጣ። በዚህም የተነሳ በመገናኛ ብዙሀን ጭምር የተዘገበ የአትላንታው «የኦሮሞ ትግል መሪዎች» እና የኦቦ ዳዎድ ኢብሳ ውዝግብ እንደነበረ አስታውሳለሁ።

«የምዕራብና የምስራቅ ኮማንድ ፖስት» መሪነትን አልቀበልም ብሎ «በኢትዮጵያ የተቀጣጠለውን የኦሮሞ ሕዝብ አመጽ የምመራው እኔ ነኝ» ሲል ድፍረቱን ያሳየው ኦቦ ዳዎድ ያ ሁሉ ነገር ከታለፈ በኋላ ትጥቁን አውርዶ እንደ አንድ የፖለቲካ ፓርቲ በሰላማዊ መንገድ ለመንቀሳቀስ ወደ አገር ቤት መግባቱን ሲነገር ብንሰማም እሱ ግን ድፍረቱን ጣራ አድርሶ ኤርትራ ሳለ የአትላንታው «የኦሮሞ ትግል መሪዎች ኮንቬንሽን» የሰጠውን የኮማንድ ፖስት አዛዥነት እምቢኝ ብሎ «በኢትዮጵያ የተቀጣጠለውን የኦሮሞ ሕዝብ አመጽ የምመራው እኔ ነኝ» እንዳለው ሁሉ ዛሬም የፖለቲካ ፓርቲን አልቀበልም ብሎ መንግሥት የመሆን ፍላጎት እንዳለው ያወጀ ይመስላል። በአገዛዙ ልሳን በፋና ቴፔቭዥን ቀርቦ በአንደበቱ «ትጥቅ የሚያስፈታኝ አካል ሊኖር አይችልም» ሲል መንግሥትነቱን አወጀ።

ዐቢይ አሕመድ [የዳወድን መንግሥት ትጥቅ አስፈትቶ የኢትዮጵያ ብቸኛው የመንግሥት መሪ መሆኑን እስኪያረጋግጥ ድረስ ጠቅላይ ሚንስትር አልለውም] አዋሳ ላይ ባደረገው ንግግር «ከየትኛውም ብሔር እና አካባቢ ይሁን ሕግን የጣሰ አካል ተጠያቂ መሆን እንዳለበት ኢሕአዴግ አቅጣጫ አስቀመጧል» ሲል ተናግሮ ነበር። ቀረበ በተባለው አቅጣቻ መሠረት ግን አዲስ አበባ ላይ ተቀምጦ ያውም በራሱ በአገዛዙ ልሳን በዋልታ ቀርቦ «ትጥቅ ሊያስፈታኝ የሚችል ማንም አካል የለም» በማለት በፎከረው ባለው ዳዎድ ኢብሳ ላይ ግን እስካሁን ተጠያቂ አልተደረገም! ነው ዳዎድ ራሱ በልሳናቸው የነገረንን እያጣራነው ነው ይሉን ይሆን? ዘንድሮ መቼም እንደማጣራት የረከሰ ቃል የለም!

የፍትሕ ሚንስትር ባለሥልጣኖቹ እነ ታዬ ደንደአ እንደለመዱት ዳዎድ ኢብሳ «ትጥቅ ሊያስፈታኝ የሚችል ማንም አካል የለም» ሲል መንግሥት መሆኑን ያወጀበትን መግለጫ የሰጠው ኦነግ ሳይሆን በኦነግ ስም የሚንቀሳቀሱ ግለሰቦች ናቸው ይሉን ይሆን?

Leave a Reply

This site uses Akismet to reduce spam. Learn how your comment data is processed.