Saturday, December 14, 2019
Home > ዜና > ኦነግ ከመንግስት ከባድ ማስጠንቀቅያ ተሰጠው!

ኦነግ ከመንግስት ከባድ ማስጠንቀቅያ ተሰጠው!

FBC ኦነግ ወደ ሀገር የገባው ትጥቅ ፈትቶ ነው፤ አሁንም ቢሆን የቀረውን ትጥቅ መፍታት አለበት አለ የመንግስት ኮሙዩኒኬሽን ጉዳዮች ጽህፈት ቤት።

የመንግስት ኮሙዩኒኬሽን ጉዳዮች ጽህፈት ሚኒስትር ዴኤታ አቶ ካሳሁን ጎፌ በዛሬው ልአት በሰጡት መግለጫ፥ መንግስት የፖለቲካ ምህዳሩን ለማስፋት ባደረገው የሰላም ጥሪ መሰረት በርካታ የፖለቲካ ድርጅቶችና የትጥቅ ትግል ሲያደርጉ የነበሩ ሀይሎች ወደሀገር መግባታቸውን አስታውሰዋል።

የኦሮሞ ነፃነት ግንባርም (ኦነግ) በአስመራ በተደረጉ ሶስት ድርድሮች በሰላማዊ መንገድ ወደ ሀገር ገብቶ ለመፎካከር መስማማቱም አስታውሰዋል።

ሆኖም ግን በድርድሩ ወቅት ትጥቅ የመፍታት ጉዳይ እንዳልተነሳ እና ጉዳዩ ያልተነሳውም የመደራደሪያ ጉዳይ ስላልሆነ ነው ሲሉም ገልፀዋል።

ይሁን እንጂ ኦነግ ወደ ሀገር ሲገባ 1 ሺህ 300 ያህል ጦሩን ትጥቅ አስፈትቶ መግባቱንና ጦሩም በአሁኑ ሰዓት በጦላይ ማሰልጠኛ ስልጠና እየተከታተለ ነው ብለዋል።

አቶ ካሳሁን አክለውም፥ ሰላማዊ ትግል የሚደረገው በሀሳብ እንጅ በአፈሙዝ ስላልሆነ ትጥቅ የመፍታትን ጉዳይ ለድርድር የማናቀርበውና ቀይ መስመር ነው ሲሉ አቶ ካሳሁን በመግለጫቻቸው ተናግረዋል።

ስለሆነም የኦሮሞ ነፃነት ግንባር (ኦነግ) አቋሙን እንደገና በመፈተሽ ትጥቁን እንዲፈታ መንግስት ጥሪውና ያቀርባልም ብለዋል አቶ ካሳሁን።

ይህ ካልሆነ ግን የዜጎችን ደህንነት ለማስጠበቅና ህገ መንግስታዊ ስርዐቱን ለማስጠበቅ ሲል መንግስት ትጥቅ የማስፈታቱን ስራ እንደሚሰራም ገልፀዋል።

መንግስት ህግን የማስከበር ስራውን በቆራጥነት ስለሚሰራ መላው ህዝብ የደህንነት ችግር ይገጥመኛል በማለት ስጋት ላይ እንዳይወድቅና እንዳይደናገር መልእክት ማስተላለፋቸውን የመንግስት ኮሙዩኒኬሽን ጉዳዮች ጽህፈት ቤት አስታውቋል።

Leave a Reply

This site uses Akismet to reduce spam. Learn how your comment data is processed.