Monday, July 22, 2019
Home > ዜና > “ከባርነት ሞትን እመርጣለሁ”

“ከባርነት ሞትን እመርጣለሁ”

ባሕር ዳር፡ጥቅምት 01/2011 ዓ.ም(አብመድ) በግብርና ሙያ ላይ የተሰማራዉ አዉሮፕላን አብራሪ በአማራ ክልል ደጀን ወረዳ አለቅታም ቀበሌ የተወለደው ካፕቴን ዮሀንስ ተስፋየ በኤሌክትሪካል ምህንድስና ከመቀሌ ዩኒቨርሲቲ ተመርቋል፡፡ በኢትዮጵያ አየር መንገድ በአብራሪነት በመቀጠር በርካታ የሀገር ዉስጥ እና ዓለም አቀፍ በረራዎችን አድርጓል፡፡

ካፕቴን ዮሀንስ አየር መንገዱ ባወጣዉ መስፈርት መሰርት አልፎ እና ስልጠናዉን አጠናቆ ለሁለት ዓመታት ያክል በስራ ቆይቷል፡፡ ከአዉሮፕላን አብራሪነቱ በማንነቱ ምክንያት እንደተፈናቀለ እና በግብርና ሙያ ላይ ተሰማርቶ እንደሚገኝ ተናግሯል፡፡ በማንነቱ ከሚደርስበት መሸማቀቅ ለመራቅ ግብርናዉን መምረጡንም ገልጿል፡፡ ‹‹በግብርና ስራየ ነጻነት ይሰማኛል፡፡ከባርነት ነጻነት- ሞትን እመርጣለሁ፡፡ በአየር መንገዱ ዉስጥ የደረሰብኝን መሸማቀቅ እኔ ነኝ የማዉቀዉ›› በማለት ካፕቴን ዮሀንስ ስሜቱን ገልጿል፡፡

በአማራነቱ ምክንያት ስድብ እና ዘለፋ እንዲሁም ተደጋጋሚ ቅጣት ይደርስበት እንደነበር ካፕቴኑ ተናግሯል፡፡ ለምሳሌ ‹‹ትምህርቴን የጨረስኩ እና የመንገደኞች በረራ የጀመርኩ የነበረ ቢሆንም እንደተማሪ የልምምድ በራራ እንዳደርግ አለቃየ ይጫነኝ ነበር›› ብሏል፡፡

በመጨረሻም ለሶስት ወራት ከስራ እንደሚታገድ ሲነገረዉ የአብራሪነት ሙያዉን መተዉን እና በእርሻ ስራ መሰማራቱን ገልጿል፡፡ በሱ ላይ የገጠመዉ ማንነት ላይ ያተኮረ ችግር ብዙ አብራሪዎች እና የአየር መንገዱ ሰራተኞች ላይ እንደሚደርስም ካፒቴን ዮሀንስ ተናግሯል፡፡

ዘጋቢ፡- ይገርማል አማረ

አዘጋጅ፡- ቢኒያም መስፍን

Leave a Reply

This site uses Akismet to reduce spam. Learn how your comment data is processed.