Wednesday, April 24, 2019
Home > ዜና > በአዲስ አበባ ህገ ወጥ የመሬት ወረራ መበራከቱን ኮሚሽኑ አስታወቀ! – FBC

በአዲስ አበባ ህገ ወጥ የመሬት ወረራ መበራከቱን ኮሚሽኑ አስታወቀ! – FBC

FBC – በአዲስ አበባ ከተማ የመሬት ወረራን ጨምሮ ህገ ወጥ ተግባራት እየተበራከቱ መምጣታቸውን የአዲስ አበባ ከተማ ፖሊስ ኮሚሽን አስታወቀ።

የአዲስ አበባ ከተማ አስተዳደር ፖሊስ ኮሚሽን እና ደንብ ማስከበር ጽህፈት ቤት አመራሮች እና ባለ ድርሻ አካላት ዛሬ ተወያይተዋል።

በውይይቱ ወቅት የከተማ አስተዳደሩ ፖሊስ ኮሚሽን ኮሚሽነር ሜጀር ጄኔራል ደግፌ በዲ፥ ከቅርብ ጊዜ ወዲህ በከተማዋ ህገ ወጥ የመሬት ወረራና ተግባር እየተበራከተ መምጣቱን ተናግረዋል።

ከመሬት ወረራው ባሻገርም የኮንትሮ ባንድ ንግድ እና ህገ ወጥ የመንገድ ላይ ንግድ መበራከቱንም ነው የተናገሩት።

ይህን ለመከላከልና የህግ የበላይነትን ለማስፈንም ህብረተሰቡን በማሳተፍ ውጤታማ ስራ ሊያሰራ የሚያስችል እቅድ አዘጋጅቶ ወደ ተግባር መግባት ወሳኝ መሆኑን ተናግረዋል።

ለወንጀሉ መስፋፋት መንስኤ በሆኑ ጫት ማስቃሚያ፣ ሺሻ ማስጨሻ እና ቁማር ማጫወቻዎች ላይ ልዩ ትኩረት ይሰጣል ያሉት ኮሚሽነሩ፥ የተደራጁ ወንጀለኞች ላይ እየተወሰደ ያለው እርምጃም ተጠናክሮ ይቀጥላል ብለዋል።

የአስተዳደሩ ደንብ ማስከበር አገልግሎት ጽህፈት ቤት ስራ አስኪያጅ ኮሚሽነር ፍስሃ ጋረደው በበኩላቸው፥ ደንብን የማስከበር ስራ ለተቋማት ብቻ የሚተው ስራ አለመሆኑን ገልጸዋል።

ከዚህ አንጻርም ህብረተሰቡና ባለ ድርሻ አካላት ህግን ከማስከበር አኳያ ሁለቱ ተቋማት እያደረጉት ላለው ጥረት እገዛ እንዲያደርጉ ጠይቀዋል።

ኮሚሽኑ እና ጽህፈት ቤቱም በከተማዋ እየተስተዋለ ያለውን ህገ ወጥ ተግባር ለመከላከል የሚያደርጉትን ጥረት አጠናክረው እንደሚቀጥሉ ማሳወቃቸውን የአዲስ አበባ ከተማ አስተዳደር ፖሊስ ኮሚሽን ለጣቢያችን የላከው መግለጫ ያመላክታል።

Leave a Reply

This site uses Akismet to reduce spam. Learn how your comment data is processed.