Sunday, September 22, 2019
Home > ዜና > “አዲስ ግልብጦች አረጋጉት!” – ዮሐንስ መኮንን

“አዲስ ግልብጦች አረጋጉት!” – ዮሐንስ መኮንን

ባልና ሚስት ተጣልተው በር ዘግተው ይደባደባሉ፡፡ ሚስትየው ኃይለኛ እና ጉልበተኛ ኑራ ባልየውን አስወድቃ ሆዱ ላይ ቁጭ ብላ ትወቃው ጀመር፡፡ ባልየውም ዱላው ቢበዛበት እሪታውን ያቀልጠዋል፡፡ ጩኸቱን የሰሙ ሠፈርኛ እና ጎረቤት ለግልግል ግልብጥ ብለው መጥተው በሩን ያንኳኳሉ፡፡ ባል ሆዬ ከስር ሆኖ በልምምጥ ሚስትን እንዲህ ይላታል ‹‹በዚህ ሁኔታ ጎረቤቶቻችን ቢያዩን ለእኔም ላንቺም ውርደት ነው፡፡ አንቺም ‹ባሏን የምትደበድብ ጋለሞታ› ትባያለሽ፡፡ እኔም ‹ሚስቱ የምትቀጠቅጠው ፈሪ› ተብዬ መሳለቂያ እሆናለሁ፡፡ ስለዚህ ባይሆን እንደወጉ አንቺ ከሥር ሁኚ እና እኔ ከላይ ልሁን›› ይላታል፡፡ ሚስት ትስማማና ባል ከላይ ደብዳቢ ሚስት ከታች ተደብዳ መስለው ይገለበጣሉ፡፡

በሩ እልከፈት ያላቸው ገላጋዮች ‹‹ሲጋደሉ እዴት ዝም ብለን እናያለን ?›› በማለት በር ሰብረው ሲገቡ ባል ከላይ ሚስት ከታች ሆነው ተናንቀዋል፡፡ ባልየውን ‹‹ምነው? ምነው? የልጆችህን እናት እንዲህ ትጨክንባታለህ? በል ተነስ ልቀቃት›› ቢሉት ‹‹ሞቼ እገኛለሁ እንጂ አልለቃትም›› አለ! ምነው? ቢሉት ምን ቢላቸው ጥሩ ነው ? ‹‹አላያችሁልኝም እንጂ እኮ እኔ ‹አዲስ ግልብጥ› ነኝ›› !!!

ምን ለማለት ፈልጌ ነው (Moral of the story)…

እኔ የምለው! በዚህች ሀገር “አዲስ ግልብጥ” አልበዛባችሁም? አዲስ ግልብጥ ፓርቲዎች፣ አዲስ ግልብጥ ጎሰኞች፣ አዲስ ግልብጥ ፖለቲከኞች፣ አዲስ ግልብጥ አክቲቪስቶች፣ አዲስ ግልብጥ ሹመኞች፣ … ጩኸታቸው አደነቆረን እኮ !

ተዉ እንጂ! ስንተዋወቅ? ትናንት ከሥር ሆናችሁ ‹‹ኡኡኡኡ … አስጥሉን›› ስትሉ የነበራችሁ አንዳንዶች አሁን ደርሶ ‹‹ያዙኝ ልቀቁኝ፣ ህዝቡን ካልተደባደብኩ›› ስትሉ የውጪዎቹ ገላጋዮች ባያዩ እኛ ቤት ውስጥ የነበርነው ዜጎች የሆነውን ሁሉ እኮ እናውቃለን፡፡ በስንት ስምምነት (Negotiation) ገና ተገልብጣችሁ ከላይ ከመሆናችሁ ዛቻ እና ማስፈራያችሁ እኮ ሠፈሩን አደበላለቀው !

በአርክቴክት ዮሐንስ መኮንን

Leave a Reply

This site uses Akismet to reduce spam. Learn how your comment data is processed.