Monday, July 22, 2019
Home > ዜና > ኢንጂነር ታከለ ኡማን በምክንያት እንሞግታቸው!

ኢንጂነር ታከለ ኡማን በምክንያት እንሞግታቸው!

ኢ/ር ታከለ ኡማ ሁሌም እንደማየው ትሁት ነው። በዚያ ላይ የተረጋጋና የሚናገረውን ጠንቅቆ ያውቃል። ራዕይም ያለው ይመስላል። አዲስ አበባን በበላይነት መምራት ከጀመረበት ጊዜ አንስቶ የሚወስዳቸው እርምጃዎች ሊበረታቱ የሚገባቸው ናቸው። የተለያዩ የአሠራር ክፍተቶች ቢኖሩም; ምን ዓይነት የአስተዳደርና የአሠራር ሥርዓት እንደተረከበም ታሳቢ ሊደረግ ይገባል። አሁን እየወሰዳቸው ካሉት እርምጃዎች አንፃር ሊያጋጥሙት የሚችሉትን ተግዳሮቶች መገመትና; አንዳንዴም በሱ ቦታ ሆኖ ማሰብና አስፈላጊውን ድጋፍ መስጠት ያስፈልጋል።

ከዚህ በተቃራኒው አጉል አሉባልታ በመንዛት የከተማውን አስተዳደር ማሽመድመድና የተጀመሩት እርምጃዎች እንዳይቀጥሉ ማድረግ የማን አጀንዳ እንደሆነ ግልፅ ሊደረግና ሊሰመርበት ይገባል። አለበለዚያ ግን ሳናውቀው በለውጡ ጥቅማቸው የሚነካና “አደናቃፊ” ተብለው የተፈረጁ ኃይሎች መሣሪያ እንዳንሆን ያሰጋል።

ይህ ማለት ግን ኢ/ር ታከለ ኡማም ሆኑ የከተማው አስተዳደር ምንም ዓይነት ጥያቄና ተቃውሞ ሊቀርብባቸው አይገባም ማለት አይደለም። ሆኖም ግን የሚቀርቡት ጥያቄዎችና ተቃውሞዎች ምክንያታዊና ስትራቴጂያዊ መሆን አለባቸው። የከተማው አስተዳደርም ነዋሪው ህዝብ ቅሬታና ተቃውሞውን በተደራጀ አኳሗን መግለፅ የሚችልበትን ሥርዓት መዘርጋት ይኖርበታል። ነዋሪው ህዝብ የሚያቀርባቸውን ጥያቄዎችና ተቃውሞዎችንም በቅንነት ተቀብሎ ማስተናገድ የሚቻልበት አግባብም በግልፅ መቀመጥ አለበት።

ከዚህ በተቃራኒው “ተቃውሞ ሊያነሱ ይችላሉ” ተብለው የሚጠረጠሩ ወገኖችን ሰብስቦ ማሰር የተቃውሞ ምንጭን ማድረቅ አያስችልም። እንዳውም የተቃውሞ ሀሳብ ያላቸውን ወገኖች ከህግ አግባብ ውጭ (without due process) ሰብስቦ በጅምላ ማሰር ሌላ ተቃውሞ ሊወልድ ይችላል። ምክንያታዊ የተቃውሞ ስሜት እየተጠራቀመ ሲሄድ ደግሞ ሥርዓቱን ብቻ ሳይሆን የሀገርንም ህልውና ፈተና ላይ ሊጥል ይችላል።

ከስሜት ይልቅ “ምክንያታዊነት” ይቅደም!!!

Leave a Reply

This site uses Akismet to reduce spam. Learn how your comment data is processed.