Wednesday, January 22, 2020
Home > ዜና > ለ 7 ሚሊዮን ህዝብ አገልግሎት መስጠት የሚያስችል ሆስፒታል በዛሬው እለት ይመረቃል፡፡

ለ 7 ሚሊዮን ህዝብ አገልግሎት መስጠት የሚያስችል ሆስፒታል በዛሬው እለት ይመረቃል፡፡

ለግንባታው 207 ሚሊዮን ብር ወጪ ተደርጎበታል፡፡

ባሕር ዳር፡ጥቅምት 30/2011 ዓ.ም(አብመድ) ለ 7 ሚሊዮን ህዝብ አገልግሎት መስጠት የሚያስችል ሆስፒታል በባሕር ዳር ከተማ ነገ ይመረቃል፡፡

ሆስፒታሉ ‹‹ጥበበ ግዮን ስፔሻላይዝድ ሆስፒታል›› ተብሎ ተሰይሟል፡፡ መገኛውም በባሕር ዳር ከተማ አዴት መውጫ አካባቢ ነው፡፡

በአማራ ክልል ጤና ጥበቃ ቢሮ ነበር ግንባታው የተጀመረው፤ከጥቅምት 2005 ዓ.ም ጀምሮ ግን ወደ ባሕር ዳር ዩኒቨርሲቲ መተላለፉን የዩኒቨርሲቲው ፕሬዝዳንት ዶክተር ፍሬው ተገኘ ነግረውናል፡፡ ለግንባታው 207 ሚሊዮን ብር ወጪ ተደርጓል ነው ያሉት ዶክተር ፍሬው፡፡

በሙሉ አቅሙ ሥራ ሲጀምር በየቀኑ እስከ 2 ሺህ ህሙማንን የማስተናገድ አቅም አለው፤ ከ5 መቶ በላይ አልጋዎች እና 11 የቀዶ ህክምና መስጫ ክፍሎች እንዳሉትም ታውቋል፡፡ የቀዶ ህክምና መሥጫ ክፍሎችን ወደ 15 ለማሳደግም ታቅዷል፡፡

ስፔሻላይዝድ ሆስፒታል ማሟላት ያለበትን መስፈርት ያሟሉ ክፍሎች እንዳሉትም ያገኘነው መረጃ ያሳያል፡፡ 51 ስፔሻሊስት ዶክተሮች እንደሚመደቡለትም ነው ዶክተር ፍሬው የገለጹልን፡፡

በስፔሻላይዝድ ሆስፒታሉ ውስጥም 5 ሺህ የህክምና ተማሪዎችን የመቀበል አቅም ያለው ግቢ እየተጠናቀቀ መሆኑ ታውቋል፡፡ ለሆስፒታሉ በጀት እንዳልተመደበለት የተናገሩት ፕሬዝዳንቱ ጉዳዩ በከፍተኛ የመንግሥት የሥራ ኃላፊዎች ትኩረት እንዲሰጠው ጥሪ አቅርበዋል፡፡

ምንጭ: አማራ መገናኛ ብዙሃን ዘጋቢ፡- አስማማው በቀለ

Leave a Reply

This site uses Akismet to reduce spam. Learn how your comment data is processed.