Monday, May 20, 2019
Home > ዜና > 4 የመከላከያ ሰራዊት አባላት 5 ተጠርጣሪ ወንጀለኞችን ሲያሸሹ በቁጥጥር ስር ዋሉ

4 የመከላከያ ሰራዊት አባላት 5 ተጠርጣሪ ወንጀለኞችን ሲያሸሹ በቁጥጥር ስር ዋሉ

በምዕራብ ጎንደር ዞን ቋራ ወረዳ ቁጥር አንድ በሚባለው አካባቢ የብሔር ግጭት በመፍጠር ወንጀል የሚፈለጉ 5 ተጠርጣሪዎችን በመኪናቸው ሸራ አልብሰው ወደ መተማ ወረዳ ለማሻገር የሞከሩ 4 የመከላከያ ሠራዊት አባላት በአካባቢው ኅብረተሰብ በቁጥጥር ሥር ውለው ለፖሊስ ተላልፈው ተሰጥተዋል፡፡

የምዕራብ ጎንደር ዞን ፖሊስ መምሪያ ተወካይ ኃላፊ ዋና ኢንስፔክተር ዓባይ አሻግሬ እንዳስታወቁት ተጠርጣሪዎቹ በቁጥጥር ሥር የዋሉት በቋራ ወረዳ ቁጥር 4 ነፍስ ገበያ አካባቢ ሠላም በማስከበር ተግባር ላይ ለተሰማሩ የኢፌዴሪ የመከላከያ ሠራዊት አባላት ደመወዝ ከፍለው ሲመለሱ ነው፡፡

ተጠርጣሪዎቹ የመከላከያ ሠራዊት አባላትም ኮሎኔል አንገሶም አርአያ የ33ኛ ክፍለ ጦር 2ኛ ብርጌድ 1ኛ ሻለቃ አዛዥ፣ መጋቤ ሃምሳ አለቃ አባድር አብራሽ ሾፌር፣ አስር አለቃ ደጀን ቡልቶ የሒሳብ ባለሙያ እና ወታደር ሳምራዊት ገብረእግዚአብሔር የሒሳብ ባለሙያ መሆናቸውን ዋና ኢንስፔክተር ዓባይ ገልጸዋል፡፡

የሠራዊት አባላቱ በብሔር ግጭት ወንጀል ከሚፈለጉት 5 ተጠርጣሪዎች በተጨማሪ 2 ክላሽ፣ 322 ጥይት፣ 157 ሺህ 900 ብር፣ 9 የክላሽ ካዝና እና 2 የወገብ ትጥቅ ለሥራ በሚገለገሉበት ተሽከርካሪ ደብቀው ወደ መተማ ወረዳ ጉባይ ቀበሌ ሲያጓጉዙ ሚያዝያ 25/2011 ዓ.ም ከቀኑ 11 ሰዓት አካባቢ በኅብረተሰቡ በቁጥጥር ሥር ውለዋል ነው ያሉት፡፡

በሕግ ማስከበር ተግባር የተሠማሩ ሰዎች ሕግን ሲተላለፉ ኅብረተሰቡ ሕግን ለማስከበር በተደራጀና ሥነ-ምግባር በተሞላበት አግባብ ያደረገው ተግባር የሚመሠገን መሆኑን ዋና ኢንስፔክተር ዓባይ ገልጸዋል፡፡

‹‹በእርግጥ የአካባቢው ኅብረተሰብ ለሕግ መከበር ቁርጠኛ የሆነና የሰለጠነ ነው፤ ከዚህ በፊትም 5 ብሬን በቁጥጥር ሥር አውሎ ለፖሊስ አስረክቧል፡፡ የደቦ ፍርድ የማይፈጽም ሕጋዊና ሕግ አስከባሪ ኅብረተሰብ ስላለንም ደስተኞች ነን›› ብለዋል፡፡

ድርጊቱ የኢፌዴሪ መከላከያ ሠራዊትን የማይወክል እንደሆነ ያስረዱት ዋና ኢንስፔክተሩ ‹‹የኢፌዴሪ መከላከያ ሠራዊት ድርጊቱ የግለሰቦች መሆኑን በመግለጽ በፖሊስ ምርመራ እንዲካሄድባቸው ፈቅዷል፤ ምርመራውም ተጀምሯል›› ነው ያሉት፡፡

ምንጭ፡- አማራ ብዙሃን መገናኛ ድርጅት

Leave a Reply

This site uses Akismet to reduce spam. Learn how your comment data is processed.