Wednesday, August 21, 2019
Home > ዜና > በወንጀል እየተሳተፉ ያሉ ተጠርጣሪዎችን በህግ ጥላ ስር ለማዋል

በወንጀል እየተሳተፉ ያሉ ተጠርጣሪዎችን በህግ ጥላ ስር ለማዋል

<><><><><><><><><><><><><>

ህግ በመተላለፍ ወንጀል እየተሳተፉ ያሉ ተጠርጣሪዎችን ወደ ህግ ለማቅረብ ሰፊ ስራ እየተሠራ መሆኑን የኢፌዴሪ ምክትል ጠቅላይ ሚኒስትር ደመቀ መኮንን ተናገሩ፡፡

ምክትል ጠቅላይ ሚኒስተሩ ይህን ያሉት በባሕር ዳር እየተከሰተ ባለው የጸጥታ ችግር እና መፍትሔ ላይ ያተኮረ ውይይት በባሕር ዳር ከተማ በተካሄደበት ወቅት ነው፡፡

በውይይቱ ላይ ምክትል ጠቅላይ ሚኒስትር ደመቀ መኮንንን ጨምሮ የአማራ ክልል ርዕሰ መስተዳድር ዶክተር አምባቸው መኮንን፣ የመንግሥት የሥራ ኃላፊዎች ባለሃብቶች እና ወጣቶች ተሳትፈዋል፡፡

በከተማዋ እየተስተዋለ ያለው የጸጥታ ችግር አሳሳቢ መሆኑ፣ በአንዳንድ የባለሃብቶች ሆቴሎችና አገልግሎት መስጫ ተቋማት ላይ ጉዳት እንዲደርስ መደረጉና ይህም በሌሎች ባለሃብቶች ላይም ስጋት መፍጠሩ በውይይቱ ተነስቷል፡፡

ችግሩ ከባለሃብቶች ባለፈ በሌሎች የህብረተሰብ ክፍሎች ላይም ስጋት ፈጥሯል ያሉት የውይይቱ ተሳታፊዎች የከፋ ችግር ሳይፈጠር ስርዓት አልበኝነቱን መንግሥት እንዲያስቆም ጠይቀዋል፡፡

የኢፌዴሪ ምክትል ጠቅላይ ሚኒስትር ደመቀ መኮንን እንደገለፁት የህግ የበላይነትን ለማስከበር ሁሉም የህብረተሰብ ክፍል በመተባበር ችግሩን ከመሠረቱ ማስወገድ ያስፈልጋል ብለዋል፡፡

የፌዴራል መንግሥትም ህግን ለማስከበር እየሠራ መሆኑን የተናገሩት አቶ ደመቀ ‹‹የብዙ ድሆችን ደም የሚታደጉና በአጭር ጊዜ ውስጥ ወደ ፍትህ አደባባይ የሚያመጡ ስራዎች ተጀምረዋል፤ ህግ በመተላለፍ ወንጀል እየተሳተፉ ያሉ ተጠርጣሪዎችም ወደ ህግ እንዲቀርቡ ሰፊ ስራ እየተሰራ ነው ብለዋል፡፡

የአማራ ክልል ርዕሰ መስተዳድር ዶክተር አምባቸው መኮንን በበኩላቸው በሥርዓት አልበኝነት የባለሃብቶችን ንብረት ማውደሙ እና ሥም ማጥፋቱ መቀጠል የለበትም ብለዋል፡፡

‹‹ህግና ስርዓትን የማስከበር ጉዳይ ለመንግሥት አማራጭ ሳይሆን ግዴታ ነዉ›› ያሉት ርዕሰ መሥተዳድሩ ጥንቃቄ በተሞላበት መንገድ ህግን ማስከበር እንደሚገባም ተናግረዋል፡፡

በወጣቶችና በሕብረተሰቡ በኩል ሰላምን ለማስከበር የሚታየው ተነሳሽነት ተጠናክሮ እንዲቀጥልም ጥሪ አቅርበዋል፡፡ የጸጥታ አካላት በተጠናከረ መንገድ የህብረተሰቡን ደኅንነት የመጠበቅ ኃላፊነታቸውን እንዲወጡም ነው ያሳሰቡት፡፡ ዘገባው የአማራ ብዙኃን መገናኛ ድርጅት ነው፡፡

Leave a Reply

This site uses Akismet to reduce spam. Learn how your comment data is processed.