Wednesday, August 21, 2019
Home > ዜና > የዲሞክራሲ አቀንቃኞች ለፕሬዝዳንት ኢሳያስ አፈወርቂ የጻፉት ደብዳቤ

የዲሞክራሲ አቀንቃኞች ለፕሬዝዳንት ኢሳያስ አፈወርቂ የጻፉት ደብዳቤ

ፕሮፌሰር ወሌ ሾይንካን ጨምሮ ከ100 በላይ አፍሪካውያን የዲሞክራሲ አቀንቃኞች፣ ጸሐፊያን እና ጋዜጠኞች የኤርትራው ፕሬዝዳንት ኢሳያስ አፈወርቂ አገራቸው ለገጠማት ፈተና መፍትሔ እንዲሹ ጥሪ አቀረቡ።

ለፕሬዝዳንት ኢሳያስ አፈወርቂ በተፃፈው ግልፅ ደብዳቤ አፍሪካውያኑ የኤርትራ እና የኢትዮጵያ መሪዎች ዕርቅ ማውረዳቸውን አድንቀው ያሳስቡናል ያሏቸውን ችግሮች ጠቃቅሰዋል።

የደብዳቤው ፈራሚዎች “ከሚያሳስቡን ጉዳዮች አንዱ ለተራዘመ ጊዜ በኤርትራ የታሰሩ እና በቤተሰቦቻቸው መጎብኘት የተከለከሉት በርካታ ጋዜጠኞች እና አራማጆች እጣ-ፈንታ ነው” ብለዋል።

እንደ ሌሎች አፍሪካውያን ሁሉ ለራሳቸው እና ለቤተሰቦቻቸው የተሻለ ነገር ፍለጋ ሕይወታቸውን አደጋ ላይ ጥለው ኢ-ሰብዓዊ በሆነ መንገድ በርሐ እና ውቅያኖስ አቋርጠው የሚሰደዱ ኤርትራውያን መከራ ልባቸውን እንዳደማ የደብዳቤው ፈራሚዎች ገልጠዋል።

የአኅጉሪቱ ስደተኞች ከባሪያ ነጋዴዎች እና ሕገ-ወጥ የሰዎች አሸጋጋሪዎች እጅ ወድቀው ሊቢያን በመሳሰሉ አገሮች በገበያ እስከ መሸጥ መድረሳቸውን ያስታወሱት እነ ወሌ ሾይንካ በርካታዎቹ የተሻለ ሕይወት ፍለጋ እንደወጡ በባሕር ላይ አልቀዋል ሲሉ አክለዋል።

ባለፉት 25 ዓመታት የአፍሪካ አገሮች መዋዕለ-ንዋይ እና የአገር ጉብኚዎችን በመሳብ ረገድ መሻሻሎች ማሳየታቸውን ዜጎቻቸው የተሻለ ሐሳብን የመግለጽ ነፃነት፣ የመገናኛ ብዙኃን ነፃነት፣ የመንቀሳቀስ ነፃነት የህግ የበላይነት፣ ገለልተኛ የፍትኅ ተቋማት እንዳገኙ የገለጹት አንድ መቶ ሶስቱ አፍሪካውያን ኤርትራ ግን ወደ ኋላ ቀርታለች ሲሉ ተችተዋል።

“ባለፉት ሁለት አስርት ዓመታት እንደ አለመታደል ሆኖ ኤርትራ በአኅጉራችን እጅጉን የተዘጋች እየተባለች ትገለፃለች” ያሉት ፈራሚዎች ፕሬዝዳንት ኢሳያስ አፈወርቂ የሚመሯት አገር ለአፍሪካ ብቻ ሳይሆን ለዓለምም ብዙ ነገር ልታበረክት የምትችል ሐብታም አገር ነበረች ብለዋል።

ከፈራሚዎቹ መካከል አንድም ኤርትራዊ ባይገኝም በማኅበራዊ መገናኛ ዘዴ ተጠቃሚ ኤርትራውያን ዘንድ ግን የተደበላለቀ ምላሽ ተሰጥቶታል።

አፍሪካ ለአፍሪካውያን የምትበጅ ትሆን ዘንድ በተለያዩ የሥራ ዘርፎች የተሰማሩ የአኅጉሪቱ ተወላጆች የጀመሩትን ጥረት በርካቶች አድንቀዋል። ሌሎች “ኤርትራ ኢ-ፍትኃዊ ማዕቀቦች ሲጣሉባት የት ነበራችሁ?” ሲሉ የደብዳቤውን ፈራሚዎች ተችተዋል።

ከደብዳቤው ፈራሚዎች መካከል ኢትዮጵያዊቷ ደራሲ መዓዛ መንግሥቴ፣ ሶማሊያዊው ጋዜጠኛ ሙስጠፋ ሐጂ አብዲኑር፣ ኬንያዊው የጸረ-ሙስና አራማጅ እና አታሚ ጆን ጊቶንጎ ይገኙበታል።

Leave a Reply

This site uses Akismet to reduce spam. Learn how your comment data is processed.