Wednesday, August 21, 2019
Home > ማህበራዊ > በአማራ ክልል በተቀሰቀሱ ግጭቶች የተጠረጠሩ 224 ሰዎች በቁጥጥር ሥር

በአማራ ክልል በተቀሰቀሱ ግጭቶች የተጠረጠሩ 224 ሰዎች በቁጥጥር ሥር

በአማራ ክልል እና በአጎራባች አካባቢዎች በተቀሰቀሱ ግጭቶች እጃቸው አለበት ተብለው የተጠረጠሩ 224 ሰዎች በቁጥጥር ሥር መዋላቸውን የክልሉ ጠቅላይ አቃቤ-ሕግ አስታወቀ።

የአማራ ብሔራዊ ክልላዊ መንግሥት አቃቤ-ሕግ ምግባሩ ከበደ በዛሬው ዕለት በባሕር ዳር ከተማ በሰጡት ጋዜጣዊ መግለጫ በቁጥጥር ሥር የዋሉት ተጠርጣሪዎች በግድያ፣ ማፈናቀል፣ ንብረት ማውደም እና አስገድዶ መድፈር ወንጀሎች መጠርጠራቸውን ተናግረዋል።

አቶ ምግባሩ በማዕከላዊ እና ምዕራብ ጎንደር ዞኖች “ለተፈጸሙ የሰው ሕይወት መጥፋት፣ መፈናቀል ፣ ንብረት መውደም፣ የንብረት መዝረፍ አስገድዶ መድፈር ወንጀሎች ተጠያቂ የሆኑ ከ150 ያላነሱ ተጠርጣሪዎች ጉዳያቸው እየተመረመረ” ነው ብለዋል።

ጠቅላይ አቃቤ-ሕጉ እንዳሉት በኦሮሞ ብሔረሰብ አስተዳደር እና በሰሜን ሸዋ ዞን አዋሳኝ አካባቢዎች “ማስረጃ ቀርቦባቸው በሚገባ የተመሰከረባቸው” በአጠቃላይ 50 ሰዎች በቁጥጥር ሥር ውለዋል።

“ከሰሜን ሸዋ ዞን ወደ ስምንት የሚሆኑ ተጠርጣሪዎች የተያዙ ሲሆን ቀሪዎቹ 42 ደግሞ ከኦሮሞ ብሔረሰብ ዞን አስተዳደር የተያዙ ተጠርጣሪዎች ናቸው” ሲሉ ተደምጠዋል።

በቤኒሻንጉል ጉሙዝ እና በአማራ ክልሎች አዋሳኝ አካባቢዎች በተፈጠረው እና ዛሬም ቁጥሩ በውል ያልታወቀ ሰው የተገደለበት እና የተፈናቀለበት ግጭት ጋር ተያይዞ በአዊ ዞን ከሚገኘው ጃዊ አካባቢ 24 ተጠርጣሪዎች በቁጥጥር ሥር መዋላቸውንም ገልጸዋል።

Leave a Reply

This site uses Akismet to reduce spam. Learn how your comment data is processed.