Monday, September 16, 2019
Home > ዜና > ህውሀት አብረን አንሰራም አለ

ህውሀት አብረን አንሰራም አለ

‘’የሰኔ 15ቱ ግድያን አዴፓ ሃላፊነት ካልወሰደ አብረን አንሰራም’’ የህውሀት መገለጫ

የህውሀት ማዕከላዊ ኮሚቴ ሰኔ 15 ቀን 2011 ዓ.ም. ለተፈጸሙ ግድያዎች አዴፓ ኃላፊነት እንዲወስድ ካልሆነ ግን አብሮ ለመሥራት እንደሚቸገር አስጠንቅቋል።

የሕወሓት ማዕከላዊ ኮሚቴ ለሁለት ቀናት ያደረገውን አስቸኳይ ስብሰባ አጠናቆ ባወጣው መግለጫ የኢትዮጵያ መከላከያ ሠራዊት ኤታማዦር ሹም ጄኔራል ሰዓረ መኮንን እና ብርጋዴየር ጄኔራል ገዛኢ አበራ ግድያ ገለልተኛ በሆነ ሐገራዊ ወገን ተጣርቶ ለሕዝብ ይፋ እንዲሆን ጠይቋል።

«ሀገር እየተበተነ ያለው ከዚህም ከዚያም የተሰባሰበ የትምክህት ኃይል ነው፤ አዴፓ በጥፋቱ ፡ በተለይም የአመራሮችን ግድያ በተመለከተ በዝርዝር በመገምገም ወደ ተጠያቂነት እንዲሸጋገር፡ ከዚህ በመነሳትም የኢትዮጵያ ሕዝብን ይቅርታ እንዲጠይቅ» ጥሪ አቅርቧል።

አዴፓ ያሉበትን ውስጣዊ ችግሮች በመሸፋፈን ለደረሰው ጥፋት ሦስተኛ ወገንን ተጠያቂ ሊያደርግ አይገባም ያለው ማዕከላዊ ኮሚቴው «ይህን የማያደርግ ከሆነ ሕወሓት ከአዴፓ ጋር መሥራት እንደሚቸገር መታወቅ አለበት» ብሏል።

ትናንት ማምሻውን ይፋ የሆነው የማዕከላዊ ኮሚቴው መግለጫ ጠቅላይ ምኒስትር ዐቢይ አሕመድ በሊቀ-መንበርነት በሚመሩት ኢሕአዴግ ውስጥ ተፈጥሯል ያለው የጎራ መደበላለቅ ሊለይ እንደሚገባ አሳስቧል። ኢሕአዴግ እና የኢትዮጵያ መንግሥት በቀጣይ ዓመት የሚደረገው ምርጫ ላይ ያላቸውን አቋም ይፋ እንዲያደርጉም ጠይቋል።

የኢትዮጵያ መከላከያ ሠራዊትም የሀገርን ደኅንነት የማስጠበቅ ግዴታውን እንዲወጣም ሕወሓት ጥሪ አቅርቧል። አያይዞም ሕዝብን እና ሀገርን ከመፃኢ አደጋ ለማዳን ተመሳሳይ ዓላማ ካላቸው ኃይሎች ጋር ሰፊ መድረክ ከፍቶ ለመታገል ዝግጁ መሆኑንም አስታውቋል።

«የሕዝቡን ጥያቄ በኃይል አልያም በሌላ መንገድ ለመፍታት የሚደረግ ጥረት ፍጹም ተቀባይነት የለውም» ሲል የደቡብ ክልል ጥያቄ መመለስ ያለበት በህግ አግባብ ብቻ ነው በማለት አቅጣጫ አስቀምጧል።

ዘገባው የጀርመን ድምፅ ነው።

Leave a Reply

This site uses Akismet to reduce spam. Learn how your comment data is processed.