Saturday, December 14, 2019
Home > ዜና > “የኢትዮጵያ መንግሥት ስብከቱን ትቶ ስራዉን ይስራ÷ ስብከቱን እኛ እንሰብከዋለን።”

“የኢትዮጵያ መንግሥት ስብከቱን ትቶ ስራዉን ይስራ÷ ስብከቱን እኛ እንሰብከዋለን።”

‹‹ምክርና ስብከት በቂ አይደለም፤ ስብከቱንም ማስተማሩንም እኛ እናከናውነዋለን፡፡›› ብጹዕ አቡነ ኤርምያስ

ባሕር ዳር፡ መስከረም 21/2012 ዓ/ም (አብመድ) መንግሥት የያዘውን አካሄድ እንዲያስተካክልና ሕዝበ ክርስቲያኑ ኢትዮጵያን ደኅንነቷን ጠብቆ ለትውልድ የማስተላለፍ አደራውን እንዲወጣ የሰሜን ወሎ ዞን ሀገር ስብከት ሊቀ ጳጳስ ብጹዕ አቡነ ኤርምያስ አሳሰቡ::

በግሸን ደብረ ከርቤ ክብረ በዓል ላይ የሰሜን ወሎ ዞን ሀገረ ሰብከት ሊቀ ጳጳስ ብጹዕ አቡነ ኤርምያስ በቤተ ክርስቲያን ላይ እየተፈፀመ ያለው ጥቃት መንግሥት ሕግን ባለማስከበሩ የመጣ መሆኑን ተናግረዋል፡፡

እንደ ዘርዓ ያዕቆብ ያሉ ነገሥታት እንዳሁኑ ፖለቲከኞች ‹እኔ እበልጣለሁ› በሚልና በትግል ሳይሆን ተፈልገው የሀገር መሪዎች ይሆኑ እንደነበር በመልዕክታቸው ያስታወሱት ሊቀ ጳጳሱ እነዚህ የኢትዮጵያ ነገሥታት መመሪያ የማያከብሩትን ይቀጡ እንደነበርም ገልጸዋል፡፡

‹‹አሁንም አንድ መሪ ለመመሪያ የማይገዛ ሰው ካለ መቅጣት አለበት፡፡ ዛሬ ይህ ጎድሎ ነው ቤተ ክርስቲያን የተቃጠለችው፤ የሀገር መሪ አመፀኛን መቅጣት ይገባዋል፡፡ እንደ ዘረ ያቆብ ያለመሆን ያመጣው ስህተት ነው፤ መንግሥት ትክክለኛና ፍትሐዊ እርምጃ መውሰድ አለበት፤ መናገር፣ ምክርና ስብከት በቂ አይደለም፤ ስብከቱንም ማስተማሩንም እኛ እናከናውነዋለን፤ ቤተ ክርስቲያን ወርቅ ሰጥታ ጠጠር ነው የተወረወረባት›› ብለዋል፡፡
‹‹መስቀሉ የሀገር ሀብት ነው›› ያሉት ሊቀ ጳጳሱ ዓፄ ዘርዓ ያዕቆብና ዓፄ ቴዎድሮስ በሀገርና በሕዝብ ላይ የሚነሳን ጥፋተኛ ይቀጡ እንደነበርና በሐሳብ ልዕልና ያምኑ እንደነበርም አስታውሰዋል፡፡ ‹‹አሁን ላይ አደራችን ብዙ ነው፤ መስቀሉን፣ ፅላተ ሙሴንና ሌሎች ቅርሶቻችን እንዴት ወደ ትውልድ እናስተላልፋለን የሚለው ነው ሊያስጨንቅ የሚገባው›› ብለዋል፡፡

ሊቀ ጳጳሱ እንዳሉት ፅላተ ሙሴ የመላው ኢትዮጵያውያን ሀብት ነው፤ ኢትዮጵያዊነቱን ለረሳ ብቻ ነው ሀብት ያልሆነው፤ ለማያምኑትም በራሳቸው መንገድ ሀብት ነው፤ ‹‹አደራውን መንግሥትም፣ እኛም፣ የማያምኑትም ልንጠብቀው ይገባል›› ነው ያሉት፡፡

‹‹አሁን መንግሥት የያዘውን አካሄድ ሊያስተካከክል ይገባል›› ያሉት ሊቀ ጳጳሱ እርስ በእርስ መወነጃጀል ቅርስን ለትውልድ ለማስተላለፍ አደጋ በመሆኑ ሊታሰብበት እንደሚገባም ነው ያሳሰቡት፡፡

ኢትዮጵያን ደኅንነቷን ጠብቆ ለትውልድ የማስተላለፍ አደራ ሕዝበ ክርስቲያኑ እንዳለበት የተናገሩት ሊቀ ጳጳስ ብጹዕ አቡነ ኤርምያስ በስም መለወጥ ብቻ ሳይሆን በምግባርና በአስተሳሰብ እንለወጥ ብለዋል፡፡

በኪሩቤል ተሾመ

Leave a Reply

This site uses Akismet to reduce spam. Learn how your comment data is processed.